مصر طول عمرها في صدارة الموسيقى العربية، وده واضح من أيام أم أم كلثوم وعبد الحليم وعبد الوهاب ومن أيام محمد فوزي لما لحن النشيد الوطني الجزائري…وغيره كتير كمان….وطبعا من قبل كده بـشوية كمان…من أيام الفراعنة ومصر ليها دور وفضل كبير في تطوير الموسيقى.
اللي عاوز اقوله إن مصر ليها صوت مميز وبصمة واضحة في الموسيقى، يمكن الصوت ده قادم من المطرب، أو اللحن، أو الآلات.
ومش بس مصر معروفة بالموسيقى فقط، ديه كمان معروفة إن فيها أحسن وأشهَر صناع عود و طبلة في العالم.
والمفاجأة إن فيها كمان ناس تانية…صناع آلات موسيقية، يمكن مش ظاهرين قوي، بس أنا حبيب في المقال ده إني أحط السبوت لايت على جزء منهم، لانهم ناس تستاهل التقدير على شغلهم وتفانيهم.
لازم تعرفو الناس ديه!
Eagle Luthiers
خلونا نبدأ بـ آلة صوتها مصري صميم، العود.
الناس ده بقالها فترة شغالة وعاملة اسم ليها كويس جدا، ده طبعا شيء صعب لأن مصر أصلا فيه صناع عود مالهمش حل.
وعاوز اقول كمان انهم مش بس بيصنعوا العود، لا و ده كمان بيعملوا كاخون!
شغلهم موجود علي الموقع الرسمي والفيسبوك والانستجرام
NMR Pedal (بدلات النمر)
عارفين الأجهزة اللي بتعمل مؤثرات صوت زي صدى الصوت وأصوات جيتار الروك؟
دول بيسموهم بدلات مؤثرة الصوت…ومش بس علشان الجيتار.
تعرفه إن فيه ناس بتعمل بدلات جيتار في مصر؟ ومصريين؟ آه، تصدق…
لحد دلوقتي هم عاملين بيدال واحدة، ديستورشن بيدال….واسمها….دسطورشي.
اتمنى اشوفهم عاملين بيدالز كتير بصراحة لان شغلهم جميل وشكل البيدال كمان حلو جدا.
ممكن تتفرجوا على شغلهم علي الاستجرام:
حمزة أحمد
أي شخص بيلعب موسيقى مش بس بيحتاج آلات، بيحتاج كمان كماليات للآلات علشان يحافظ عليها مثلا.
الراجل ده بيعمل بيدال بورد، وديه بتكون سطح مصنوع من الخشب أو المعدن علشان تركب فيه بدلات الجيتار جنب بعض وتقدر تتحرك بيهم بـسهولة و شنط للجيتار بتكون ناشفة من بره ومبطنة من جوه علشان توفر أعلى معايير أمان للجيتار بتاعك….وعلى فكرة، هو أصلا جيتارست، فـ هيفهمك بسهولة.
هتلاقو شغل حمزة موجود علي الفيسبوك
MEDO Electronics
الميدي كنترولر…وهو جهاز بيتوصل بالكمبيوتر علشان تسجل أصوات مختلفة زي كمنجات وطبول وغيره وغيره…مش طلع فيه منه بيتعمل في مصر؟ شكرا.
محمد هشام، بيعمل حاجات كتيرة قوي….قوي….
بيعمل أجهزة ميدي كنترولر للتحكم في برامج التسجيل على الكمبيوتر، وبيعمل كابلات عالية الجودة للتسجيل، وبيعمل بيدالز مؤثرات صوت…أنا اتخضيت لما شفت شغله أول مرة على الفيسبوك.
ممكن تشوفه كل حاجته هنا وتتخضوا زينا بالظبط:
الآلات الموسيقية تتحدث العربية!
تحية قوية جدا لكل حد بيشتغل وينتج وبيطلع حاجة حلوة ومفيدة، الناس ديه تستاهل التقدير وتستاهل إنها تتعرف أكتر، علشان يكبروا ويكبروا السوق المصري لصناعة الآلات الموسيقية.
شكرا ليكم.